Tenderi me vlerë të parashikuar prej 10 milionë eurosh për ndërtimin e mbikalimit dhe nënkalimit në Veternik të Prishtinës është bërë objekt i shqyrtimit në Organin Shqyrtues të Prokurimit, pas ankesës së kompanisë “Sallahu” SH.P.K.

Projekti i iniciuar nga Komuna e Prishtinës, e udhëhequr nga kryetari Përparim Rama, parashihet të realizohet në bashkëfinancim me Ministrinë e Mjedisit, Planifikimit Hapësinor dhe Infrastrukturës.

Sipas raportit të ekspertizës të datës 2 tetor 2026, disa nga kërkesat e përcaktuara në dosjen e tenderit janë kundërshtuar për shkak të ndikimit të mundshëm në konkurrencën ndërmjet kompanive.

Një nga çështjet kryesore lidhet me kërkesën e Komunës që operatorët ekonomikë të disponojnë dy ekskavatorë me peshë minimale prej 53 tonësh.

Eksperti teknik i OSHP-së vlerësoi se një peshë e tillë minimale nuk ishte e domosdoshme për realizimin e punimeve dhe rekomandoi ndryshimin e kriterit në dy ekskavatorë me peshë minimale prej 35 tonësh.

Në ekspertizë janë trajtuar edhe kërkesa të tjera për makineri, pajisje dhe kapacitete teknike të operatorëve ekonomikë.

Pas shqyrtimit të pretendimeve të kompanisë “Sallahu”, eksperti shqyrtues Ibadete Guri dhe eksperti teknik Enver Bytyçi i kanë propozuar panelit të OSHP-së që ankesa të aprovohet si pjesërisht e bazuar.

Ata kanë rekomanduar që Komuna e Prishtinës të përmirësojë dosjen e tenderit dhe të zgjasë afatin për dorëzimin e ofertave.

Megjithatë, ekspertiza nuk përbën vendimin përfundimtar. Në regjistrin e kontrolluar të OSHP-së, lënda 684/26 figuron ende në proces.

Rasti ngre pyetje për mënyrën e përgatitjes së kritereve teknike në një nga projektet infrastrukturore me vlerë të konsiderueshme në kryeqytet.

Mbetet të shihet nëse paneli i OSHP-së do t’i miratojë rekomandimet e ekspertëve dhe çfarë ndryshimesh do të bëjë Komuna e Prishtinës në procedurën e tenderimit.