103 tonë mish i skaduar drejt Kosovës, dyshime për ndërrim etiketash – Muja paralajmëron operacion të madh inspektimi

Rasti i mbi 100 tonëve mish me afat të skaduar, të ndaluar në Mal të Zi derisa ishin të destinuar për Kosovë, ka rikthyer shqetësimet për sigurinë ushqimore në vend. Ministri i Bujqësisë, Armend Muja, ka paralajmëruar një nga operacionet më të mëdha të inspektimit të mishit në Kosovë, ndërsa autoritetet malazeze kanë raportuar edhe për ndërrimin e etiketave të afatit të përdorimit.

Në një deklaratë për Ekonomia Online, Muja ka bërë të ditur se institucionet kosovare janë në fazën përfundimtare të procesit të kontrollit zyrtar dhe se për rastin kanë qenë në komunikim të vazhdueshëm me autoritetet e Malit të Zi.

Sipas tij, javën e ardhshme pritet edhe një vizitë për të diskutuar çështjen e mishit të ndaluar dhe bashkëpunimin ndërinstitucional.

“Kosova dhe Agjencia e Ushqimit janë duke realizuar një nga operacionet më të mëdha të inspektimit të mishit ndonjëherë në Republikën e Kosovës”, deklaroi Muja.

Ministri ka siguruar se çdo shkelje eventuale e dispozitave ligjore do të trajtohet nga institucionet kompetente dhe se publiku do të informohet për parregullsitë që mund të konstatohen pas përfundimit të procedurave.

Çfarë ndodhi me 103 tonët e mishit?

Rasti kishte marrë vëmendje gjatë shtatorit, kur autoritetet e Malit të Zi ndaluan në Portin e Tivarit katër kontejnerë me mish viçi të ngrirë, me origjinë nga Brazili, të destinuar për kompaninë kosovare “Apetit SHPK”.

Sipas të dhënave të Doganës malazeze, në dy operacione të ndara u ndaluan gjithsej 102,491 kilogramë mish me afat të skaduar, apo afro 103 tonë.

Por ajo që ngriti shqetësime shtesë ishte konstatimi i autoriteteve malazeze se në tre kontejnerët e parë etiketat origjinale, që tregonin afatin e skaduar, ishin hequr dhe ishin zëvendësuar me etiketa që paraqisnin një afat tjetër përdorimi.

Kompania “Apetit” ka deklaruar më herët se afati i mishit kishte skaduar për shkak të vonesave në transportin ndërkombëtar dhe se asnjë sasi nga këto ngarkesa nuk ishte futur në tregun e Kosovës.

Kontrollet në Kosovë, priten rezultatet

Agjencia e Ushqimit dhe Veterinarisë kishte njoftuar se nga 18 shtatori kishte nisur kontrolle të detajuara ndaj operatorit ekonomik, duke përfshirë dokumentacionin e importit, origjinën e produkteve, afatet e përdorimit dhe sasitë e shpërndara.

Ndërkohë, Muja ka paralajmëruar se rezultatet e kontrolleve dhe çdo parregullsi e konstatuar do t’i bëhen të ditura publikut pas përfundimit të procedurave përkatëse.

Rasti mbetet në vëmendje, ndërsa pritet të sqarohet nëse inspektimet në Kosovë kanë evidentuar produkte të pasigurta në qarkullim dhe nëse do të ketë masa ndaj ndonjë subjekti përgjegjës.

Burime: Ekonomia Online, Vijesti, Agjencia e Ushqimit dhe Veterinarisë.