Trump urdhëron hetim ndaj Richard Grenellit, ish-emisarit për Kosovën – në qendër të skandalit miliona dollarë dhe mesazhe sekrete!

Një zhvillim i bujshëm ka tronditur rrethin e bashkëpunëtorëve të presidentit amerikan Donald Trump. Richard Grenell, një nga aleatët e tij të njohur dhe ish-emisari special për dialogun Kosovë–Serbi, është vënë në qendër të një hetimi të brendshëm të Shtëpisë së Bardhë lidhur me pretendime për një donacion shumëmilionësh dhe premtime për qasje te presidenti amerikan.

Sipas një hulumtimi ekskluziv të mediumit amerikan Axios, të publikuar më 19 tetor 2026, presidenti Trump ka urdhëruar këshilltarin ligjor të Shtëpisë së Bardhë të shqyrtojë pretendimet ndaj Grenellit.

Në qendër të çështjes ndodhet një mesazh i datës 3 maj 2025, që pretendohet se Grenell ia kishte dërguar biznesmenit turk Turhan Mildon.

Miliona dollarë dhe premtime për takime me zyrtarët më të lartë amerikanë

Sipas Axios, mesazhi i dyshuar përmbante një ofertë që lidhte transferimin e parave me mundësinë për të marrë pjesë në ngjarje ekskluzive dhe për t’u afruar me administratën amerikane, përfshirë vetë presidentin Trump.

Në këtë çështje përmendet një transaksion prej 17.6 milionë dollarësh drejt kompanisë amerikane Texas Armament & Technology, me seli në Hjuston.

Sipas pretendimeve të biznesmenit Mildon, rreth 5.6 milionë dollarë nga kjo shumë ishin paraparë si donacion për qendrën prestigjioze kulturore Kennedy Center, të cilën Grenell e drejtonte në atë periudhë.

Megjithatë, donacioni i pretenduar nuk figuron të jetë pranuar nga institucioni.

Hulumtimi i Axios ngre edhe pikëpyetje për origjinën e fondeve, pasi dokumentacioni i shqyrtuar tregon se transferimi prej 17.6 milionë dollarësh ishte bërë nga Ministria e Financave e Republikës Demokratike të Kongos.

Ish-avokatja e Trumpit i paraqet akuzat në Shtëpinë e Bardhë

Çështja mori përmasa të reja pasi Alina Habba, ish-avokate e presidentit Trump dhe bashkëshortja e biznesmenit Turhan Mildon, ia paraqiti personalisht presidentit pretendimet për donacionin që dyshohet se nuk kishte arritur në destinacion.

Takimi u zhvillua më 9 tetor në Zyrën Ovale.

Pas kësaj, Trump kërkoi nga këshilltari ligjor i Shtëpisë së Bardhë, Will Scharf, të shqyrtonte rastin.

Sipas Axios, dokumentet e dorëzuara më pas përfshijnë mesazhe elektronike, korrespondencë dhe të dhëna financiare, të cilat po verifikohen nga ekipi ligjor.

Grenell mohon kategorikisht akuzat

Richard Grenell ka hedhur poshtë pretendimet, duke i cilësuar të pavërteta dhe absurde.

Ai ka mohuar se ka kërkuar që para të transferoheshin në emër të një donacioni për Kennedy Center dhe ka deklaruar se nuk ka marrë asnjë pagesë nga biznesmeni Mildon.

Grenell ka mohuar gjithashtu autorësinë e mesazhit që po shqyrtohet nga Shtëpia e Bardhë.

Autoritetet po përpiqen të verifikojnë autenticitetin e komunikimeve dhe të sqarojnë rrjedhën e parave.

Çfarë lidhjeje ka Grenell me Kosovën?

Richard Grenell është figurë e njohur edhe për opinionin publik në Kosovë.

Ai ka shërbyer si emisar special i presidentit Trump për negociatat ndërmjet Kosovës dhe Serbisë, duke luajtur rol në procesin që çoi te marrëveshjet e Uashingtonit të shtatorit 2020.

Zhvillimet e fundit në SHBA e rikthejnë Grenellin në vëmendjen ndërkombëtare, kësaj radhe jo për angazhimet e tij diplomatike, por për pretendimet që po shqyrtohen brenda administratës